有啲女客人真係抵得諗到你唔信，完全唔會計較對方收入比佢少、甚至係生得矮過佢，就好似以下介紹嘅W，佢就係一份子！
W接近40歲，係A0，唯一嘅感情經歷，就係曾經有過一個好曖昧嘅對象。佢參加我哋單對單約會服務時，已經知自己到咗一個唔應該再白白等待嘅年齡。佢知道自己外表唔算十分突出，雖然收入唔錯，但擇偶都冇乜特別要求，只係希望對方係老實善良嘅人。而且佢唔係首次諮詢時客套先咁講，服務佢時間內，佢真係一直冇改變呢個諗法。
為咗追番挽回唔到嘅光陰，佢參加服務後好勤力，上我哋化妝同護膚班時好用心，上完堂仲會溫書同練習技巧。而且每次約會後，佢都會認真聆聽我哋嘅意見，再細心改進。
W係一個好善良嘅女仔，對我哋都好有禮貌，佢見完最後一個約會對象後，覺得對方係一個好好嘅男仔，老實有風度。不得不提，呢個男士矮過佢差唔多半個頭，但W完全唔介意，而呢位男士都表示對W有好正面嘅感覺，但因為男士比較慢熱，佢哋仲慢慢發展緊，希望我哋快啲聽到佢嘅好消息啦!
By: Mean Baby@HKRD
沒有留言:
張貼留言