每場Speed dating活動上，都有幾十人參與，參加者五花八門，有啲客人令我哋有特別深刻印象。就好似以下呢位男客人Y，佢嘅行為舉止太突出，比較容易被記得。
初次見Y，覺得佢哋都幾搶眼，因為佢高大又識打扮，外表幾突出，一嚟到好多女仔都望住佢。玩遊戲至食飯時，佢表現都冇乜特別，但一到轉位傾偈環節，佢就「現形」啦。
有部份女仔比較樸素、唔識打扮，外表冇咁吸引，每次當Y轉位時遇上呢種女仔，佢竟然毫不修飾，低頭玩電話，望都唔望下對方。對面女仔當然好尷尬啦，唯有都玩電話捱過嗰幾分鐘，搞到氣氛好差。
坦白講，我哋都明白要同一個人交往落去，都要符合自己眼緣先，每次speed dating活動，總唔會個個都合你心水。不過我哋都要有修養，就算知道對方冇可能同你發展落去，都唔好令人難堪，話唔定做唔成情侶你哋都可以做好朋友呢。更何況喺呢個公眾場合，你嘅每一個舉動，都被大家看在眼裏。就好似Y，如果佢想同場內一個靚女交往，個靚女見到佢咁嘅舉動，都會對佢大打折扣。記得個場活動J冇任何配對到嘅參加者，相信都係呢個原因啦～
By: Mean Baby@ HKRD
通常過咗35歲，遇到一個合適對象，客人都會好快結婚。就好似以下呢位單對單約會男客人，佢老實又識照顧人，好快就同一位斯斯文文、心地善良嘅女仔結婚啦～
男客人J離過一次婚，進行單對單約會資訊時，佢同顧問好坦誠咁分享佢嘅經歷。佢明白到一段婚姻唔止係一方出現問題，自己都要付一定程度責任。離婚後佢都有拍過拖，但同呢位前女友價值觀有出入。資詢時佢都有啲擔心，會唔會好難再遇到一個適合共渡下半生嘅女仔呢？但係其實我哋一啲都唔擔心，佢要求貼地人又正氣，我哋都相信佢好快會遇到另一個對象。o
不出所料，好多單對單約會女客人都想認識佢，但佢好快就鎖定左對象。對方係一個心地善良、要求簡單嘅女仔，人好有愛心，成日做義工。約會幾次後，佢哋越傾越投契，J知道呢位就係適合佢嘅對象，所以好快就叫我哋將佢檔案下架。半年後，佢哋已經開始籌備婚禮，真係一個完美嘅結局啊～
By: Mean Baby@ HKRD
好多人冇留意到，只要你有同理心，喺愛情上已經贏咗人哋一大步。以下呢位呢位單對單約會男客人，竟然每次約會後都被女仔劣評，究竟發生咩事呢？
男客人K年過半百，經歷過一段婚姻，唔係離婚而係喪偶，所以我哋都意想唔到，結過婚嘅佢兩性溝通上會出現重大問題。每次約會前，我哋都會提醒客人，唔好喺茶餐廳或food court進行約會，因為環境太嘈吵。點知有次K出嚟約會後，臨時改變主意，帶個女仔周圍走，雖然途中女仔已經話好攰，佢都冇反應，最後揀咗喺一個food court食飯。
除此之外，佢最大嘅問題係，成日有佢講冇人講，冇留意到女仔有冇興趣展開呢個話題。再加上佢講嘢比較直接，例如會話對方眼袋好大等等。Oh my god～呢樣都嚇咗我哋一跳。
老實講，喺中年界別，因為女多男少，男士係比較佔優嘅。但今時今日好多女士都唔需要依靠男士，面對一個唔理想嘅s對象，佢哋寧願單身都唔會想屈就，所以無論你條件如何，都要保持有品！
By: Mean Baby@HKRD
雖然女仔外表係好重要，但如果要長遠發展一段關係，內在美同樣重要。我哋曾經遇過一個20幾歲樣子甜美嘅單對單約會女客人，當時好多客人都想認識佢，但係往往完成第一次約會後，男仔對佢都表示怕怕，究竟點解呢？
事緣呢位女客人C成日覺得自己好老，好想快啲結婚生仔，佢又好重視金錢嘅，曾經講過，佢公屋出身，好想嫁一個經濟條件比較好嘅男仔。呢樣事唔出奇，奇就奇在佢會好直接咁問對方關於錢嘅嘢。例如曾經有一位金融出身嘅男仔，佢好努力工作，唔夠35歲已經有自己物業。第一次約會個男仔好有心思，早早喺一間唔錯嘅酒店餐廳book咗位。
約會當日，C不停問佢嘅工作同收入，個男仔都好有禮貌咁答佢。直至最後，C知道個男仔媽媽以前係做比較低下層工作，竟然即刻反白眼！雖然個男仔都好有風度，現場都冇表示啲咩，但呢次約會後佢好有陰影，唔敢隨便應約，我哋都覺得有啲唔好意思。
你可能會奇怪問，乜顧問唔會教單對單約會客人點樣改善溝通技巧嘅咩。當然有啦，我哋顧問老細都同佢講過無數次，但佢好似跌入自己嘅迴圈咁，成日都聽唔到我哋講嘅嘢。老實講，女仔想有一個經濟條件好嘅伴侶都好正常，但大家都要有相應條件同對方連結到，起碼最基本嘅禮貌同溝通技巧都缺一不可。已我哋所知，C仲係單身，性格同擇偶要求都冇改變，但係女仔青春好寶貴，希望佢會有一日醒覺啦～
By: Mean Baby@HKRD
好多時單對單約會唔係一擊即中嘅，透過不同約會，你會知道自己有咩地方可以改善得更好，正如以下呢位男客人，我哋見證住佢約會技巧越嚟越有進步，最後佢成功同一位斯斯文文、性格亦都唔錯嘅女仔拍咗拖～
呢位男客人A戀愛經驗唔多，最初幾次約會佢遇到個女仔非常心動，不停送禮物送花，對對方展開熱烈追求。雖然佢誠意唔錯，但係溝通技巧爭少少，好多時唔知點樣同女仔交流，到最後個女仔慢慢疏遠佢，佢情緒非常崩潰，當時我哋都好驚訝，始終佢哋連拖都未拍。
最後無需送花送禮物，A都成功拍拖呀～好多人天生都唔係桃花運極強嘅人，但如果你肯改變心態，仲有一日會成功嘅！
By: Mean Baby@HKRD
直至今時今日，好多人仲有個誤解，認為參加Speed dating活動嘅，一定係爛茶渣。如果你仲有呢個想法，實在太落後啦～我哋成日都喺Speed dating 活動上見到啲筍盤，就好似以下呢位男醫生M，實在係一表人才～
「醫生都會參加Speed dating？佢一定係好樣衰，一係就係毒男！」你會唔會有呢個諗法呢？但M絕對以上皆否，佢外表斯斯文文，當日參加活動時以smart casual打扮示人，外表都唔錯㗎～而且佢談吐得體，對工作人員唔該前唔該後，絕對冇溝通問題。
M表示，因為佢唔想喺職場上有任何誤會，所以唔會揀同同事拍拖。同其他人一樣，如果唔想同同事拍拖，本身又唔係特別鍾意出去玩，醫生圈子都有所限制，所以佢就嚟參加Speed dating活動。
呢次活動係佢第一次參與，活動過後，佢覺得氣氛唔錯，唔覺尷尬。當日全場女仔都想同佢交換聯絡方法，我哋喺活動後一段時間聯絡番佢，佢同我哋講已經差唔多同其中一位參加者發展去另一個階段啦。M一擊即中，大家都唔好再等啦～
By: Mean Baby@HKRD
每個speed dating活動，都有唔同嘅年齡同學歷限制，為咗保障各位參加者，我哋間中會抽樣檢查大家嘅身分證，確保大家冇虛報年齡。間唔中有啲參加者會反應好大，點都唔肯出示證明俾我地睇，其實我哋真係用心良苦㗎，亦都唔會睇大家身分證號碼，睇完以下呢個故事你就會明。
有次活動，有個頭髮稀疏老態龍鍾嘅男士嚟參加，雖然活動屬於成熟組，但係我哋最大都係接受到48歲嘅男士。呢位伯伯擺到明冇65歲都有58歲啦，但佢竟然報一個細佢10歲要求嘅活動。當我哋要求佢出示證明文件時，佢不斷推搪， 照樣硬闖入場，同啲女仔一路傾計一路扮搵身份證。
不過～大家眼睛都係雪亮嘅，在場女參加者大多數係30尾或40頭，佢哋都希望認識最多大佢哋10年嘅男士。講真呢位伯伯又冇乜嘢嘅，對女士都有風度有禮貌，但係一睇佢外表，相信女士只能視佢為前輩，都幾難幻想同佢日後發展。
類似個案間唔中都會出現，例如你會見到望落係40幾歲嘅姨姨，報名參加年輕專業人士活動。講真即使俾你過到骨參加活動又點呢，都要參加者互相同意你先會識到人㗎嘛，所以奉勸各位要誠實，報返符合自己條件嘅活動，如果唔係你只係嘥咗自己時間同金錢～
By: Mean Baby@HKRD
有啲女客人真係抵得諗到你唔信，完全唔會計較對方收入比佢少、甚至係生得矮過佢，就好似以下介紹嘅W，佢就係一份子！
W接近40歲，係A0，唯一嘅感情經歷，就係曾經有過一個好曖昧嘅對象。佢參加我哋單對單約會服務時，已經知自己到咗一個唔應該再白白等待嘅年齡。佢知道自己外表唔算十分突出，雖然收入唔錯，但擇偶都冇乜特別要求，只係希望對方係老實善良嘅人。而且佢唔係首次諮詢時客套先咁講，服務佢時間內，佢真係一直冇改變呢個諗法。
為咗追番挽回唔到嘅光陰，佢參加服務後好勤力，上我哋化妝同護膚班時好用心，上完堂仲會溫書同練習技巧。而且每次約會後，佢都會認真聆聽我哋嘅意見，再細心改進。
W係一個好善良嘅女仔，對我哋都好有禮貌，佢見完最後一個約會對象後，覺得對方係一個好好嘅男仔，老實有風度。不得不提，呢個男士矮過佢差唔多半個頭，但W完全唔介意，而呢位男士都表示對W有好正面嘅感覺，但因為男士比較慢熱，佢哋仲慢慢發展緊，希望我哋快啲聽到佢嘅好消息啦!
By: Mean Baby@HKRD
作為顧問，我哋可以比大家更了解當中嘅核心問題。例如單對單約會男客人P、47歲未婚，佢從事金融業，不論香港同國內都有多個物業。佢外表斯斯文文，興趣主要同音樂有關，鍾意唱歌嘅佢仲幫自己錄過專業唱片。另外佢仲鍾意潛水，又有出下書，可話文武雙全。
單睇以上簡介，各位女士係咪好心動呢？冇錯佢嘅外在條件真係唔錯，但點解佢成日都單身呢？並唔係因為佢唔想拍拖，相反佢好想快啲結婚快啲生小朋友，而因為佢覺得一拍拖就要做老婆， 所以佢會極度小心， 好擔心自己做錯決定，所以會放大對方一舉一動黎睇，基本上約會頭30分鐘佢已經會決定唔再同呢個人溝通落去。
我哋有時覺得好奇怪，點解喺佢口中形容嘅女客人，完全唔似我哋認識嗰位嘅呢？男客人冇留意到嘅問題都好似俾佢一一發現咁。
之後我地循循善誘，叫佢下次約會時試下聽人哋嘅說話，唔好質疑對方，放心交友，多啲就住對方發表嘅意見問落去，唔好成日太主觀先。
其實我哋都好想佢快啲拍到拖㗎，佢之後都多咗對人信任，多欣賞人優點。
其實男士雖然有更多時間可以揮霍，但如果到咗50歲，都比較難搵到適合生育下一代嘅伴侶，所以我哋都希望咁多位客人，參加Speed Dating或單對單約會時要投入認識眼前對象，欣賞對方多啲，珍惜呢段緣份，咁樣你脫單嘅機會先會增加的。
By: Mean Baby@HKRD
時下好多後生仔生活圈子有限，都會參加單對單約會，今日Mean Bady就要分享一個!!22歲!!後生仔求愛故事。
男士同女士嘅黃金期唔同，女士20歲頭係最吃香，但男士喺呢個階段唔算好吸引，因為女仔通常喜歡比較成熟嘅男士。所以J入會時，我哋都好坦白同佢講，佢要等更長時間，先會遇到合適對象。
J好明白事理，一直好耐心等我哋介紹，期間佢好上進，會參加我哋嘅 dating 講座，了解如何增加自己吸引力。另外佢工作認真，喺工程界發展嘅佢，仲接受過傳媒採訪，絕對係藍籌股嚟㗎。
皇天不負有心人，入會半年左右，佢就遇上女仔F喇。佢哋可以話一拍即合，好有兩小無猜嘅感覺。第一次 dating 佢哋好開心，全程嘻嘻哈哈，期間佢知道F想去坐摩天輪，就即刻把握機會約對方隔一星期去。約會一個月後，佢哋就成為情侶啦。不得不提，呢次係F嘅初戀，所以J同我哋講，會好好守護對方，幾個月後對方生日，佢仲send相俾我哋睇佢買咗乜嘢禮物同埋喺邊度慶祝添，真係Sweet~ Mean Baby最欣賞呢啲直接又好人嘅客戶，衷心祝福你哋啊！
By: Mean Baby@HKRD
雖然我哋成日睇客觀數據，會發現女性過咗35歲搵到男朋友嘅時間，會比20幾歲女仔長，但係如果，你好似以下呢個個案女主角咁，一樣可以好吸引人，好快揾到㗎。
單對單約會女客人H，參加我哋服務時係42歲，但佢一直都好注重保養，keep 靚自己，話佢33歲都有人信。除此之外，我哋認為佢最大嘅優點，係有理性客觀思維。佢好明白到自己歲數比較輸蝕，也過左生小朋友黃金時間，所以佢會代入男士的角度思考，揀一啲貼近自己條件嘅男士。
例如，部分好似佢年紀嘅未婚女士，仲會好有堅持，要認識同自己年紀同收入相若，同樣未婚嘅男士，有啲或者會加多樣要求就係外表吸引。
女客人H本身做公司中層，人工唔錯，佢要求男方只要有獨立經濟條件，性格穩重善良就可以。
H除咗擁有嘅年輕外表，佢仲明白到男士鍾意溫柔大方嘅女性，所以多位男會員對佢印象都好好，覺得佢約會時表現得好得體。參加服務半年左右，佢同我地一位單對單約會男會員開始有眉目喇。
男會員經營生意多年，曾經離婚有小朋友，佢約會多次後，認定咗溫柔體貼嘅H係佢理想對象。H同一時間認為男會員成熟穩重，對佢好有好感。幾個月後佢哋開始拍拖，拍拖後半年我哋就收到佢哋囍帖喇！
各位年過40嘅女士，只要大家抱有正面客觀的心態，大家都可以遇到理想對象嘅！
By: Mean Baby@HKRD
上次提及善良女客人W對伴侶外在要求唔高，只係着重對方內涵。唔知大家有冇留意呢，我仲陳述到佢“貫徹始終”，由咨詢時到完結合約，都保持呢個態度。
點解我咁強調呢點，係因為某部份客人咨詢時想展現一個美好印象，乜都話冇所謂，但真正服務佢哋時，往往會慢慢變質。
好不容易地，我地為佢安排左幾次約會，據我哋所知，頭兩名男客人都有再約佢，但完成第一次約會後，佢覺得唔啱feel，就即刻唔再覆人。
我哋同佢傾過，一見鐘情的機會率有幾咁低，唔好成日一次定生死，而且佢已經30歲有4，可以觀察多一兩次先。不過佢份人都有啲硬頸㗎，唔係好接受我哋意見。
有趣在佢好強調男士身高要170，但當有一次我哋提及有個新會員係醫生時，佢即刻表示好有興趣，而呢位醫生身高只係得168，外表又唔係平時佢鍾意嘅陽光類型，佢都話好想認識。不過，你揀人、人揀你，醫生想識返啲專業人士，所以最後都唔應約。
其實B揀親嘅男士條件都好優秀，呢樣都好正常，但我哋成日都強調，大家要換個角度睇，諗諗佢哋又想搵乜嘢對象呢？
好多女仔有個錯覺，以為自己人工唔錯，自然吸引到更加高收入嘅男仔。不過99%男士真係唔睇呢啲㗎，佢哋都係在乎一個女仔年齡、外表、同埋係咪有體貼的性格。
B入會時33歲，由於佢期間人工有升幅，擇偶要求不停提高，但客觀年紀又大一年，佢嘅配對成功率自然會下降。同時B唔算係一個好在乎打扮嘅人，冇乜接受我哋嘅造型同保養意見，而且有水腫問題，所以也會影響左成功率。
其實，我哋覺得每一個女士都一定能配對到一位錫自己嘅伴侶，只要大家願意配合同進步，多啲聽取我哋嘅意見，咁就可以好容易告別單身㗎啦，希望各位speed dating同單對單客人都可以從以上個案學懂一課啦～
By: Mean Baby@HKRD
呢位單對單約會女客人F都幾靚女架，所以，以前都識過幾位有錢男朋友。不過我Mean Baby都講過無數次，漂亮外表無疑係幫你爭取到更多入場券，但要有長遠穩定感情，就好睇性格喇。就係因為咁，F雖然識過好幾位筍盤，最後都被分手。
F嚟做咨詢時，提番以前男朋友係幾咁有錢，所以希望搵番個年薪起碼過百萬又要有物業嘅伴侶。雖然我哋公司都有唔小咁嘅筍盤，但我地都察覺問題所在，多次同佢深情傾偈，分享番我地幾位同事嘅愛情故事，我地想話俾佢知真愛無價，touch wood我哋老公有咩事失業，我哋都依然會愛佢，陪佢渡過難關。
不過喺F嘅世界中，“愛”喺關係中，並唔係必需品，佢著重嘅只有對方俾唔俾到物質資源佢。
因為F外表唔錯，都先後有幾位條件唔錯嘅男會員邀約佢，但好快男士們就話冇興趣繼續了解佢。事關F都幾坦白，每次約會都會要求去中高級餐廳，而且拖都未拍，就會要求男士送某個名牌手袋俾佢。後來，F因為喺出面識到男朋友而完結合約，不過聽聞，之後冇耐佢地就散咗喇，直到今日F依然係單身。唔知隨住歲月增長，佢會唔會大個囡咗識諗咗呢？
By: Mean Baby@HKRD
無可否認，外表出眾嘅人喺愛情路上係有更多機會，但都有唔少人唔係外貌協會會員嚟架。就好似單對單約會女客人P，佢純粹欣賞一個人嘅內在美，愛上咗我地一個樣子冇咁吸引嘅男客人。
男客人有啲肥，又因為遺傳關係，未夠40歲就甩咗一半頭髮。因為咁，佢冇乜自信，第一次約會時都好坦白同P講，自己因為外表輸蝕，好多女仔都請過佢食過檸檬。P當時安慰佢話外表並唔係一切，每個人都有好多方面黎展現自己。男客人聽完後好感動，對佢好有好感，之後好有誠意咁追求P。
P一直俾我地嘅感覺係好隨和，而且好開朗成日笑，所以我地都相信佢一定會遇到一個好鍚佢嘅男仔。喺佢地第一次約會後兩星期左右，我地再跟進佢情況，佢話俾我地聽同嗰位男客人了解中，都幾開心。再過兩星期，佢就話俾我地知佢拍拖嘅好消息喇～
P同我地講，約會期間佢覺得男客人好有誠意，而且同佢好啱傾，對方冇嘢係佢可以挑剔到嘅。由佢地初相識到拍拖，P除咗開解到呢位男客人，仲識得欣賞到伴侶嘅每一個優點，真係令人感動！
By; Mean Baby@HKRD
講真我地真係見過好多人，都知道呢個世界咩人都有！話說有單嘢真係幾好笑，有位女客人思緒唔係咁清晰，有次我地同同下佢理性討論，佢招架不來，突然扮係自己秘書逃離現場！
呢位單對單約會女客人唔係好跟我地合約條款，私下pm我地啲男會員，不經我地協調，以致雙方在文字上産生誤會，約會唔成，反成結仇。
重點黎喇，佢pm人問乜呢…？
開估！佢未見面已經問對方問題問到督，例如：會問埋對方拎IG，然後質問對方點解有咁多女仔朋友、甚至問埋人做乜要follow咁多女仔！
男人好怕麻煩，當然會被嚇怕啦。小部份招架得來嘅，都願意繼續同佢約會。不過佢查問完人地家宅後，覺得對方唔符合佢心水，就遲遲唔肯俾個約會期出黎，仲要玩「潛水」。
因為咁，我地就努力協調啦，問過好幾次佢幾時可以約會，佢好多時都已讀不回，一係就成日話自己忙等等。到最後，為咗充滿誠意嘅男客人著想，唯有出最後通牒，引用番合約條款，拜託佢俾個期來。
去到呢步，佢再冇得左閃右避。殊不知！隔一分鐘後，佢send咗個message黎：「你好，我係xxx秘書，xxx而家唔喺香港，覆唔到你message。」睇到個message後，我地都笑到鏕地，真係估唔到咁都俾佢諗到。
雖知道佢只係個普通文員，冇可能有秘書，就算係其他人，都唔會上一分鐘同我地傾緊，下一分鐘就會離開咗香港掛。
我地都好有禮貌嘅，冇當場拆穿佢，只係回覆佢：「秘書應該同老闆約時間噃哈哈。」據聞佢仲係單身，都想再搵我地幫忙，但為咗我地男會員福祉著想，只能夠默默祝福佢喺外面世界搵到幸福啦!
By: Mean Baby@HKRD
講真，有幾多個人係天生麗質㗎？唔使點學習打扮就引人注目～就算本身五官標緻嘅女明星，都要後天勤護膚勤做運動，所以我地呢啲平凡人更要俾多啲心機！
單對單約會女客人E好明白事理，佢參加我地服務前真係冇呢個概念，但我地一講佢就明，而且好聽話勤力。因為佢一直係幫屋企生意手，好少同出面世界接觸，平時都係牛記笠記不施脂粉。加上佢35歲都只係拍過一次拖，平時都冇乜留意男性嘅喜好。
但佢就勝在份人超級和善，同埋有同理心，明白自己條件唔算突出，又冇乜戀愛經驗，所以一直都好配合。
上完我地化妝班後，佢好勤力練習，又不斷睇YouTube化妝片增進知識。平時又多咗留意衣著，約會時會著斯文大方嘅裙仔，化番我地教嘅妝， 驟眼望落去 仲有啲似鍾嘉欣，嘉欣bb添。
換咗新形象後，吸引到我地好幾位男會員追求。加上佢本身係個溫柔斯文嘅女仔，相信我地好快會聽到佢好消息！
By: Mean Baby@HKRD
好多人以為Speed Dating公司為咗賺錢，就咩客人都收，其實唔係架～講真，如果為咗一個人而影響到其他客人甚至係公司營運，我地收番黎一啲著數都冇。
例如單對單約會女客人H，佢後生甜美斯斯文文咁，第一次做咨詢時都算正常，只係比較著重男仔條件，好在就係對對方外表冇太大要求，我地認為以佢條件，要求都算合理。不過後來，我地就發現問題喇，到佢完約時，大家一致決定唔會再收佢為會員，因為佢誠信好有問題。
當時做完第一次咨詢時佢冇即時參加，話需要時間考慮下，呢個我地都明白。過咗兩日，佢不停各自message我地每一位同事，希望拎到折扣，但我地係冇得海鮮價嘅，應承唔到佢。
之後好搞笑嘅事就出現了，佢對住Yubi會話：「Anita應承咗會俾我幾多幾多錢一次」，對住Anita又會講類似嘅說話，難道佢認為我地同事之間係零溝通的嗎？哈哈…不過到最後，佢貨比三家後，都係決定參加我地公司。
參加服務後，佢都幾受歡迎，好多男仔邀約佢。當中好多男仔都符合佢條件，但佢有選擇困難症，每次睇完對方profile都冇反應，話要再考慮，拖得一頭半個月，啲男會員都拍晒拖啦!
間中有約會進行到，男仔們都唔想同佢繼續了解落去，事關佢嚴重欠缺同理心，好多時只會問佢想知道嘅財政問題，為對方構成壓力之餘，也冇乜心機去聆聽對方其他嗜好。
後來有一日，講你都唔信，好似做戲咁，我地有位同事喺街見到佢，煙韌拖住一個男仔，到我地同佢溝通時，即使有相片為證，佢都不斷否認嗰個男仔係佢男朋友，事關佢唔想合約被cut，想繼續約見我哋啲男仔。我哋當然唔會俾佢咁做，如果唔係實搞到啲關係勁複雜，累咗我哋啲真心認真揾伴侣的好男仔。
過咗一年，有日 H聯絡我地話想join番，我地表示提供唔到服務俾佢。點知有日佢突然walk-in上黎，因為receptionist係新同事，只聞其名未見過其人，所以俾咗份申請表佢填（提提各位，唔好 walk-in呀，我地係需要預約的） 。填表時，佢竟然寫咗個假名，可能以為我地冇人認得佢? 到顧問同事一出黎，我地當然即時記得佢係邊個啦。各位會員放心，我地會嚴密把關的！
By Meanbaby@HKRD
人過中年，對愛情會有唔同睇法，對伴侶外在與內在的條件會有另一番體會，佢哋一般會較看重同對方溝唔溝通到，希望可以搵到個靈魂伴侶。例如單對單約會男客人Ｗ，佢係好看重對方識唔識得品味生活，可以同佢一齊享受人生。
| Ｗ年過半百，幾年前因為同前妻價值觀日漸出現分歧而分開。佢係成功生意人，而且好喜歡學習，工餘時間都會繼續進修，所以忙咗幾年先決定再拍拖。嚟我地公司做咨詢時，我地發現佢係個好坦承嘅人，毫無保留地分享自己人生經歷及家庭背景，所以我地對佢印象都好好。 |
工作之餘，佢都好識享受人生，鐘意聽音樂會，自己又會學下樂器。同我地單對單約會女客人約會，佢好有心思架，揀親嘅都係環境食物一流嘅餐廳，約會後又會車對方番屋企，所以女士們對佢印象都好好。
最後，佢決定同一位47歲嘅女會員拍拖，因為對方拉得一手好小提琴，Ｗ覺得同佢性格嗜好都好啱key，可以幸褔同佢好好享受人生下半場了！
By: Meanbaby from HKRD
